【阿媽兮話】第3講
筆者台南一中同窗/高雄海軍總醫院兮內分泌科權威~陳國群醫師在生進前，和筆者見面定定會提起：「人，會食著愛會放、會行著愛免人牽、會睏著愛一暝到天光。」
會食著愛胃腸好，好消化、好吸收，煞落去愛好排泄，毋通泌結或是落屎。
會行著愛跤手溜掠，毋免舉柺仔，毋免予序細給你扶、給你牽。
會睏著愛毋通厚眠夢，毋通定定起來走便所，一暝愛好睏到天光。
人人若會當保持健康，無病無痛，按爾，著會當老皮未過風，老皮定康康；病魔未來攻，毋免予醫生摸；精神清爽，眼明腦聰；身體健康，食到一百捅。
所以，《心靈座標‧阿媽兮話》今仔日第三擺，欲紹介兮是：
阿媽留即句諺語，教咱給身體顧乎好，身體則會跤鬆手冗，少壯兮時，認真做頭路、拍拚做事業，春家賄；趁錢有數，性命著顧，老來卡未身體否去。身體一旦若有病痛，真正是用錢買未轉來健康兮。祝諸位看倌，人人會食好放，會行免人牽，逐暝好睏到天光。
諸位先賢、後進，會記得第 4 擺再會哦！
文/陳泰然
台南市台語羅馬字研究學會創會理事長